Softastur

Una de les xeres más abegoses qu’esisten ye escribir correutamente; inda más nes llingües minoritaries, pa les que l’alfabetización ente la población ye básica (siendo optimistes). Nos programes privativos esisten cuantayá ferramientes que permiten correxir los testos pa les llingües con más falantes, con toles llimitaciones que tien cualquier correutor automáticu. Pero les llingües minoritaries nun tienen interés económicu pa les grandes empreses desendolcadores y, darréu, queden albentestate nesta cuestión.

Una vez más, esi nun ye’l casu del software llibre, qu’ufre la posibilidá de que los propios falantes aprovechemos les ferramientes esistentes pa crear esti tipu d’ayudes. Vamos presentavos una d’elles, que yá lleva un tiempu disponible.

LanguageTool

LanguageTool ye un programa en Java que s’ufre dende la so web, https://www.languagetool.org/ y que val pa comprobar si un testu cumple ciertes regles gramaticales pre-definíes. Tamién tien sofitu pa comprobaciones ortográfiques.

Pa probalu val con apegar un testu determináu nel cuadru de testu de la so web y calcar nel botón «Check Text». El programa tendría de detectar la llingua de mou automáticu; si nun ye asina, habría que seleicionala nel botón izquierdu. Los posibles fallos apaecerán marcaos y, faciendo clic nellos, ufrirán una suxerencia de correición.

Naturalmente, correxir un testu llargu al traviés de la web pue ser cansao enforma. Nun hai problema, hai maneres de facelo de mou más automatizáu.

LibreOffice/OpenOffice

Estes aplicaciones pa ofimática permiten correxir un testu de la que s’escribe usando LanguageTool. Pa facelo hai qu’instalar la estensión que ta na propia web de LanguageTool, descargando’l ficheru https://www.languagetool.org/download/LanguageTool-2.4.oxt al nuesu ordenador. Darréu, abrimos el ficheru recién descargáu con unu de los programes (por exemplu, Writer), lo que llanzará l’Alministrador d’estensiones que permite instalar LanguageTool.

El funcionamientu ye paecíu al de la web, al facer clic col botón drechu nes pallabres sorrayaes n’azul apaez la regla y les suxerencies de correición. El menú de control apaecerá baxo Ferramientes->LanguageTool

Firefox

Esti navegador tamién tien el complementu pa LanguageTool, inda más fácil d’instalar. Val con dir a la páxina https://addons.mozilla.org/en-US/firefox/addon/languagetoolfx/ y calcar nel botón d’instalación. Apaecerá un iconu LT na barra de complementos de Firefox (abaxo, a la drecha) que permite comprobar el testu seleicionáu o’l testu onde tea’l punteru del mur. La configuración ta nel menú Ferramientes->Complementos de Firefox.

LanguageTool como programa llocal

Cualquier ordenador que tenga un entornu d’execución (JRE) de Java pue tener LanguageTool en mou llocal y/o como sirvidor pa otros programes que puen comunicase con él. Pa facelo, descargamos el ficheru https://www.languagetool.org/download/LanguageTool-2.4.1.zip, descomprimímoslu con una utilidá afayadiza, y na carpeta descomprimida executamos languagetool.jar pa una interfaz gráfica o languagetool-commandline.jar pa una interfaz de testu. El programa languagetool-server.jar ye’l sirvidor que pue llanzase d’una manera más cómoda dende la parte inferior del menú Comprobación de testu->Opciones… de la interfaz gráfica.

Agora nun queda más escusa que’l despiste pa nun escribir nun asturianu axeitáu. ¡Bones ediciones!