Softastur

En Softastur tamos arguyosos de notificavos que dende güei, yá podéis esfrutar de Firefox n’asturianu nel smartphone. Porque la to llingua identifícate y faite visible na rede.

Los usuarios de smartphones Android ya iOS, tiénenla disponible nes sos respeutives tiendes d’aplicaciones.

Pa ello, namái baxa Firefox dende Google Play (p’Android v5.0+) o App Store (iOS 9).
Tamién pues facelo dende estes páxines web:

• Android: https://www.mozilla.org/ast/firefox/android/
  • Pa versiones menores de la v5.0, baxa ya instala esta apk oficial (Si escueyes esta opción, la propia apk anuévase automáticamente cuando ye preciso y nun has anovala dende Google Play 😉 )

• iOS: https://www.mozilla.org/ast/firefox/ios/

En tolos casos, tendrás que dir a los axustes del to smartphone, y na configuración, camudar la llingua a Asturianu. Nel casu d’iPhone:

Dende Softastur, a toos, munches gracies.

Dientro’l públicu asturfalante siempres hebo la necesidá de cuntar con ferramientes de traducción afayadices que o nun se sabía qu’esistíen, o nun yeren práutiques d’usar nun preséu móvil o tableta. Güei Softastur ta arguyosa d’espublizar la traducción de Mitzuli.

Mitzuli ye un traductor llibre y de baldre col que podrás traducir con munches pareyes de llingües, que nel nuesu casu (pel momentu) llimítense a Asturianu <-> Español. Esta aplicación furrula gracies a otros proyeutos llibres como Apertium (ufre’l motor de traducción pa munches pareyes de llingües y el qu’usa Eslema), Tesseract (ufre reconocencia visual de caráuteres), ente otros. Amás los moos de traducción que sofita l’aplicación van dende introducción de testu fasta llectura de traducciones ensin escaecemos de traducción visual.

Llamentablemente y nesti momentu, la nuesa llingua entá nun sofita nin la reconocencia de voz nin la traducción pela cámara, namái introducción de testu magar qu’esto nun futuru puea camudar. Sicasí, Mitzuli al tar basáu n’otros proyeutos llibres y ser tamién llibre, pues collaborar pa iguar la situación y amestar la compatibilidá d’asturianu nes estayes que falten.

Ensin dubies, Mitzuli ye la meyor aplicación de traducción que tenemos pa la nuesa llingua (y munches otres) inorada en cuasi tolos proyeutos comerciales. Si quies saber más y necesites baxar yá esta aplicación, pues visitar la páxina web de Mitzuli

Güei ye’l día de Telegram n’asturianu y ye que dempués de más d’un añu, (y dellos meses ensin anovar tresnando esti anovamientu), tamos arguyosos d’anunciar que yá podéis baxalu dende la Play Store. ¡Algamémoslo, collacios!

Esti pasu perimportante nun supón namái l’anovamientu automáticu de l’aplicación ensin tener dir a la páxina que toos y toes yá sabéis, sinón que tamién ufrirá la posibilidá de tener más anovamientos nel tiempu y ensin tener d’esperar meses amás de poder ver en tiempu real la cantidá de xente qu’usa/baxa/instala/desinstala l’aplicación d’un mou 100% fiable. Agora yá nun tendrás xida dala pa nun pasate dafechu a Telegram darréu que les carauterístiques qu’esti programa ufre escontra la competencia son muncho meyores, sobremanera la llibertá y la seguranza que te da saber que too furrula como debe, ensin sospeches nin falses pallabres.

La competencia ha rindise, nós tamos equí porque naguamos pola privacidá nos nuesos preseos y tamos na revolución. La competencia nun va poder con nós y sabéislo.

Arriendes d’eso, tamos arguyosos tamién d’espublizar los paquetes de pegadielles qu’apocayá anunciamos per Twitter y que de xuru van prestavos milenta. Les opciones pa instalos son, primir en caún los enllaces dende’l restolador del movil y dempués escoyer l’apertura de les URL con Telegram, darréu Telegram amosarávos un ventanu cola vista previa de les pegadielles y u namái tienes de primir n’«AMESTAR». Sicasí, si tenéis un collaciu/a que nun ye quien o nun sabe instalar les pegadielles, podéis unvia-y una y dempués dici-y qu’al primir nella va apaece-y un ventanu u namái tien de da-y a «AMESTAR A PEGADIELLES» y dempués n’otru ventanu da-y a «AMESTAR». Por embargu, si dempués d’alloriar coles pegadielles y fartucate d’amestales nun quies nin la metá d’elles, nel menú d’Axustes y na estaya “Mensaxes” tienes una opción nomada “Pegadielles” u podrás xestionar toles tos pegadielles ya incluso poder tamién compartiles dende ehí pente enllaz. ¿Quién dixo que faltaben opciones?

Y pa finar, nun podemos escaecemos de la bayura, pero bayura de carauterístiques nueves que trai esti anovamientu y que podréis ver na páxina de l’aplicación na Play Store. Por embargu, la páxina vieya u baxabais Telegram va dexar d’ufrir la posibilidá de baxar les versiones vieyes de Telegram n’asturianu, qu’a partir de güei queden ensin sofitu y que dempués d’unos meses van dexar de furrulavos.

Ensin más dexámosvos esfrutar coles pegadielles y l’anovamientu que marca una dómina nueva en Telegram n’ast. ¡¡¡Esfrutái!!!

Más información tocante al anovamientu: http://noticies.softastur.org/telegram

Bienllegaos a la dómina de la mensaxería
rápida y segura.

VERSIÓN NUEVA ESTRAORDINARIA – 1.9.7

Inclúi:

– Igua col visor d’imáxenes y la xuba d’éstes en Telegram que facía zarrar de mou forciáu l’aplicación

Coincidiendo col llanzamientu d’Ubuntu 14.10, vamos facer unes Xornaes d’instalación en Villaviciosa. Equí tenéis el cartel:

Bienllegaos a la dómina de la mensaxería
rápida y segura.

VERSIÓN NUEVA – 1.9.6.5

Inclúi:

– Sofitu pa nomes d’usuariu. ¡Cuerri y escueyi’l de to!
– Avisu nes charres secretes al facer una captura pantalla
– Temporizador estendíu pa la destrucción de mensaxes en charres secretes
– Unviu de mensaxes en segundu planu
– Sofitu pal desaniciu automáticu d’imáxenes en charres secretes
– Compatibilidá con preseos Android Wear (relós, pulseres intelixentes…)
– Rediseñu completu de la interfaz nes tabletes
– Sofitu pa la comprensión y edición de videu. (Rique Android 4.1+)
– Gueta global d’usuarios en Telegram
– Opción “Guarda na Galería”, disponible n’Axustes
– Descarga de semeyes y videos en segundu planu
– Opción pa configurar la guarda de conteníu multimedia al tar en wifi, rede móvil o roaming
– Patrones de vibración nuevos
– Agora les xubes de ficheros nun se fadien al zarrar l’aplicación o en cualesquier otra aición
– Unviu de mensaxes automáticu
– Desaniciu de semeyes de perfil en cualesquier orde
– Milenta igües de fallos y ameyoramientos

NOTA: ¡Ye perimportante qu’anovéis l’aplicación porque dientro poco la función “Allugamientu” dexará de furrular en versiones vieyes!

En Softastur tamos terminando los trabayos de preparación pa poder ufrir OwnCloud nes próximes selmanes.

OwnCloud ye un serviciu web na nube, col que vamos poder xubir, baxar y compartir ficheros con otres persones (al mou de Dropbox), y sincronizar esos ficheros nos equipos que tengamos. La particularidá d’OwnCloud, ye que tamién va permitinos trabayar sobre ficheros de testu online, xestionar contautos, calendariu, tabla de xeres, organizar les nuestres semeyes y munches coses más.

El serviciu d’ownCloud vien arreyáu a Openmailbox.org , (corréu seguru web n’asturianu), del que yá vos avisamos hai un tiempu. El procesu a siguir ye cenciellu: facese una cuenta de corréu en openmailbox.org y l’usuariu yá va poder esfrutar del corréu más les ferramientes na nube. Cenciello, rápido, y n’asturianu 😉

UBUNTUPHONE

La otra noticia del branu, va ser la salida al mercáu d’Ubuntuphone. La empresa Canonical, firmó con Bq la integración del sistema nos sos teléfonos móviles, y tien prevista la so puesta na cai ente Setiembre/Ochobre. Según nos confirmaron dende Canonical, l’apuesta ye que los teléfonos que se vendan nel Estáu, vengan disponibles en toles llingües, seyan oficiales o non. Esto inclúi l’asturianu.

Equí vos dexamos con dalgunes semeyes de Ubuntuphone nuna máquina real (perdonái la calidá de les imáxenes):

Ayeri, Atopa (http://atopa.info) presentó un serviciu nuevu, la posibilidá d’usar Telegram dende un restolador web (Firefox, Chrome o Safari)

Les posibilidaes qu’ufre poder usar Telegram dende un restolador son perinteresantes: escribir con un tecláu afayadizu, usalu en dellos ordenadores y nun tener qu’instalar nada (incluso puede usase dende un móvil que tenga Firefox o Chrome).

Si yá tienes Telegram nel to móvil, nun tienes más que abrir Firefox y dir a: http://telegram.atopa.info  y pista!

Recordámosvos que si usáis Android, dende Softastur ufrímoste l’aplicación n’asturianu dende fai unos meses,  y que puedes baxala dende equí. Ensin dulda, cada vegada tenemos más caminos hacia la normalización que la nuestra llingua merez. 😉

Acabamos de recibir avisu de Cyanogenmod, de que los primeros teléfonos en recibir los paquetes de llingua n’asturianu son los siguientes:

• Google Nexus 7 2013 (LTE)
• Google Nexus 7 2013 (WiFi)
• Google Nexus 7 (WiFi)
• Google Nexus 5
• Google Galaxy Nexus (GSM)
• Google Nexus 4
• Google Nexus 10
• Google Galaxy Nexus (Verizon)
• Google Galaxy Nexus (Sprint)

NOTA: Hai dos formes d’instalar Android n’asturianu.

La primera, usando’l métodu OneClick (CM installer) http://beta.download.cyanogenmod.org/install que ye automáticu y evita al usuariu rootear teléfonu. La llista completa de los que tienen soporte por esi métodu ye ésta:

http://wiki.cyanogenmod.org/w/CyanogenMod_Installer

y como vos dicimos, Los Google Nexus y Google Galaxy Nexus, son los primeros en poder tener disponible la llingua asturiana. El restu de los teléfonos d’esa llista, aínda tendrán qu’esperar a recibir los paquetes, y avisarémosvos per equí.

La segunda, ye usando’l métodu manual. La llista completa, ye esta: http://download.cyanogenmod.org/?type=snapshot pero entá ha facese de mou manual, rooteando cada terminal ya instalando un recovery. La idea ye que toos estos terminales vayan incorporándose adulces al primer métodu, OneClick (CM installer), por ser munchu más cenciellu.

Esta ye una páxina desplicativa de la páxina oficial pa instalar Android. Pidímosvos paciencia, porque adulces van dir tando disponibles los distintos modelos de teléfonu.

El resume ye esti:

1. Habilitar “Unknown Sources” (“Orígenes desconocidos” o “Fuentes desconocidas”, según la versión) nel nuesu móvil.
2. Descargar l’aplicación “OneClick.apk” nel móvil
3. Instalar l’aplicación “OneClick.apk” nel móvil
4. Descargar un programa nel nuesu Ordenador (Windows Vista, 7 ó 8)
5. Esfrutar

CÓMO FACEMOS ESTO:

Vamos a la páxina oficial: http://beta.download.cyanogenmod.org/install

Traducción:

** PUNTU 1 ** PERMITIR LA INSTALACIÓN DE CYANOGENMOD INSTALLER

Abrir “Ajustes“, y dir a la seición de Seguridad (en dalgunos preseos, pues necesitar dir a la seición Aplicaciones)

Localiza la opción Unknown sources  o Fuentes desconocidas o Orígenes desconocidos.

Si yá ta marcáu, pues saltar esti pasu. Sinón, márqueslu y aceutes el mensaxe emerxente 😉

**PUNTU 2** DESCARGA L’APLICACIÓN

Dende’l TELÉFONU MÓVIL o TABLET, visita la páxina:

http://get.cm

**PUNTU 3 ** INSTALA L’APLICACIÓN

Cuando se complete la descarga, abri les notificaciones y fai click en OneClick.apk.

Toca “Instalar” pa instalar la app

Cuando acabe d’instalar, fai click en “Abrir”

Sigui les instrucciones nel to móvil pa continuar col procesu d’instalación.

** PUNTU 4 ** DESCARGAR PROGRAMA NEL ORDENADOR

Abri’l to PC. (Windows Vista, 7 o 8) y

descarga esti programa

Cuando tea descargáu, executa esi programa y sigui les instrucciones.

**PUNTU 5 ** ¡¡¡ESFRUTA!!!

nota: La llista de teléfonos compatibles pal installer OneClick ye esta:

http://wiki.cyanogenmod.org/w/CyanogenMod_Installer#Supported_Devices

De toes formes, el programa deteuta automáticamente’l to modelu y dizte si tien sofitu o non. Recomendámosvos paciencia, porque dende’l momentu de la Presentación oficial hasta la entrada en funcionamientu de tolos teléfonos, aínda puen pasar unes selmanes. Poco a poco vais poder dir instalando los vuestros modelos de móvil. Gracies.