Día de la llingua materna
21 de Febreru de 2013 por Softastur
Güei, 21 de febreru, la Unesco celebra’l Día de la Llingua Materna. En Softastur queremos xuninos a la celebración recordando que pa qu’una llingua tea viva ye importante que los falantes puedan usala en toles estayes de la vida. Poro, ye imprescindible qu’esistan tamién les ferramientes pa incorporar les llingües al mundu de la teunoloxía y les comunicaciones dixitales que yá nun formen parte del futuru sinón del presente.
Ensin esta incorporación. les llingües tan condenaes a la minorización ya l’escaezu. Sicasí, los fabricantes de software privativu nun tienen interés más que nel garapiellu de llingües que tienen cientos de millones de falantes, escaeciendo (y, dacuando, torgando) l’accesu a la teunoloxía de los falantes d’otres milenta llingües, como ye’l casu de la llingua asturiana.
Por suerte, la llóxica del máximu beneficiu económicu nun ye la del Software Llibre, que tien l’envís de buscar el máximu beneficiu social (lo que nun quier dicir que col Software Llibre nun pueda tenese tamién un beneficiu económicu). Y ye equí onde la propia comunidá de falantes tien la capacidá de defender el futuru de la llingua materna. Nes nueses manos tenemos les ferramientes afayadices pa qu’esista software na llingua llariega, qu’en munchos casos son les meyores aplicaciones esistentes, y sólo depende de nós el llugar que queramos qu’ocupe la nuesa llingua.
En Softastur queremos que la llingua asturiana siga tando ente les primeres no que cinca al software disponible, y prestaríanos dar les más fonderes gracies a toles persones que collaboren pa consiguilo, especialmente a los que s’animen a usar les aplicaciones n’asturianu y nos comenten la so esperiencia, lo que se pue meyorar y los fallos que puedan tener. Porque, al final, lo más importante del software son les persones que lu usen.
