Softastur

Por fin, y dempués de munchos años de trabayu, yá tamos en CLDR.

El Proyeutu CLDR (Common Locale Data Repository), ye un proyeutu ordenáu de datos llingüísticos, qu’apurre información de toles llingües pal so usu n’aplicaciones informátiques. Contién la información específica rexonal (‘locale’) que los sistemes operativos proporcionen a les aplicaciones y que permite tener una información coherente en diferentes plataformes y aplicaciones.

Pero.. ¿qué ye esto? ¿Pa que-y val a la nuesa llingua? Bono, pues anguaño ye la infraestructura qu’usen Google, Libreoffice, Apple, Windows, IBM, Twitter y otres empreses nel so software.

Por dicilo de dalgún mou, ye una “ficha” de la configuración de la llingua en custión.

(semeya unviada por @Josep_MCD, del equipu de Softcatalà)

Ente la triba de datos qu’inclúi CLDR tán los siguientes:

Nome de la llingua, del territoriu, nomes del día de la selmana, mes, añu, periodu del día completu y abreviáu, nomes de los fusos horarios, estayes xeográfiques, les divises, patrones de data y d’hora, conxuntos de caráuteres usaos pa la escritura de la llingua, etc. Evidentemente, esto uniformiza una bayura de términos, como por exemplu los nomes de capitales, países, etc.

Dende yá, la llingua asturiana ta incluyida en Windows y tamién nos iphone. Esto nun quier dicir que Windows o iphone vayan tar traducíos na nuesa llingua. Eso depende de les compañíes. Pero ye un primer pasu pa otres munches coses.

Dende güei yá ye posible esfrutar Telegram n’asturianu pa iOS.

Foi un camín llargu porque dempués de dos años del llanzamientu orixinal de Telegram n’asturianu p’Android, nun nos yera posible espublizar la mesma versión pa preseos iOS. Aporfiando y aporfiando… descubrióse una funcionalidá secreta nel veceru de Telegram pa iOS que fexo realidá lo que güei tais viendo. Consideráilo como un regalu de cumpleaños.

Polo demás nun hai más que cuntar namái qu’agora les versiones de Telegram pa iOS anovaránse más rápido que les d’Asturgram, non por nada, sinón porque Telegram pa iOS nun tien intermediarios metanes pa espublizar cada anovamientu.

Pa saber como «asturianizar» el to Telegram pa iOS, primi equí.

El vienres 14 de marzu…

Dende que mos torgaren l’aplicación de “Telegram n’ast” na Play Store tuviemos trabayando muncho darrera les cámares pa recuperar la normalidá, y ye verdá qu’en tou esti tiempu dexámosvos “güérfanos” porque hebo xente que dempués d’enterase de l’anuncia tocante a la nuesa entrada a la Play Store, foi escopetiao a baxar la nuesa aplicación pero llueu decatóse de que l’aplicación yá nun taba disponible. Magar que too tien una desplicación.

Tenéis de comprender tamién que nós, los collacios de Softastur, somos persones que na vida real tenemos les nueses esmoliciones y trabayu, y qu’amás d’ello si sumamos cuando asocedieron esos socesos, esa espera allargóse más.

Esti artículu que tamos escribiendo nun ye más que pa pidivos perdón poles molesties y del chascu que dalgunos llevastis de xuru. Sicasí, dempués d’esti momentu «murniu» préstamos anunciar que «Telegram n’ast» ta de nueves na Play Store, sí pero col nome y llogu camudaos ¿por qué? Porque al bloquiamos los de Google la nuesa aplicación comentáronnos que’l llogu y el nome d’ésta yeren mui paecíos a los del veceru oficial polo que mos encamentó la so camudancia. Bono, y entós ¿qué nome ye’l nuevu? Asturgram

Con Asturgram entama una domina nueva onde s’amiesta la posibilidá de poder usar los bots, un serviciu cenciellu pero mui potente; el rediseñu de la estaya «Axuntar», un reproductor integráu pa ver videos de YouTube, escuchar música de SoundCloud… etc ensin colar de l’aplicación; gueta de mensaxes nuna charra específica y toles carauterístiques de les versiones anteriores de «Telegram n’ast». Sicasí, tenéis de desaniciar cualesquier versión de Telegram/Telegram n’ast pa poder instalar Asturgram cosa qu’intentamos evitar pero Google ríquelo.

Por embargu, equí nun fina esti artículu sinón que tamién mos prestaría anunciar «HangBot», un bot de Telegram pa poder xugar al aforcáu n’asturianu soledu, en grupu o con collacios. La escoyeta ye de to. ¿Aforcáu n’asturianu? Sí sí, l’auténticu aforcáu n’asturianu, compatible cola ḥ y ḷḷ. Pa usalu namái tienes d’entrar nesta direición dende’l to móvil y escoyer Asturgram p’abrila, llueu namái tienes de primir n’«ENTAMAR» y esfrutar con elli. El so creador llámase Robin van der Vliet, ye de Paises Baxos y la so páxina web ye robinvandervliet.com, asina que ya podeís da-y les gracies.

Ensin más dexámosvos esfrutar d’Asturgram y de HangBot tando sollertes de que nun vuelva a asocedemos lo que sabéis que pasó.

Enllaz a la descarga: http://noticies.softastur.org/telegram

Güei ye’l día de Telegram n’asturianu y ye que dempués de más d’un añu, (y dellos meses ensin anovar tresnando esti anovamientu), tamos arguyosos d’anunciar que yá podéis baxalu dende la Play Store. ¡Algamémoslo, collacios!

Esti pasu perimportante nun supón namái l’anovamientu automáticu de l’aplicación ensin tener dir a la páxina que toos y toes yá sabéis, sinón que tamién ufrirá la posibilidá de tener más anovamientos nel tiempu y ensin tener d’esperar meses amás de poder ver en tiempu real la cantidá de xente qu’usa/baxa/instala/desinstala l’aplicación d’un mou 100% fiable. Agora yá nun tendrás xida dala pa nun pasate dafechu a Telegram darréu que les carauterístiques qu’esti programa ufre escontra la competencia son muncho meyores, sobremanera la llibertá y la seguranza que te da saber que too furrula como debe, ensin sospeches nin falses pallabres.

La competencia ha rindise, nós tamos equí porque naguamos pola privacidá nos nuesos preseos y tamos na revolución. La competencia nun va poder con nós y sabéislo.

Arriendes d’eso, tamos arguyosos tamién d’espublizar los paquetes de pegadielles qu’apocayá anunciamos per Twitter y que de xuru van prestavos milenta. Les opciones pa instalos son, primir en caún los enllaces dende’l restolador del movil y dempués escoyer l’apertura de les URL con Telegram, darréu Telegram amosarávos un ventanu cola vista previa de les pegadielles y u namái tienes de primir n’«AMESTAR». Sicasí, si tenéis un collaciu/a que nun ye quien o nun sabe instalar les pegadielles, podéis unvia-y una y dempués dici-y qu’al primir nella va apaece-y un ventanu u namái tien de da-y a «AMESTAR A PEGADIELLES» y dempués n’otru ventanu da-y a «AMESTAR». Por embargu, si dempués d’alloriar coles pegadielles y fartucate d’amestales nun quies nin la metá d’elles, nel menú d’Axustes y na estaya “Mensaxes” tienes una opción nomada “Pegadielles” u podrás xestionar toles tos pegadielles ya incluso poder tamién compartiles dende ehí pente enllaz. ¿Quién dixo que faltaben opciones?

Y pa finar, nun podemos escaecemos de la bayura, pero bayura de carauterístiques nueves que trai esti anovamientu y que podréis ver na páxina de l’aplicación na Play Store. Por embargu, la páxina vieya u baxabais Telegram va dexar d’ufrir la posibilidá de baxar les versiones vieyes de Telegram n’asturianu, qu’a partir de güei queden ensin sofitu y que dempués d’unos meses van dexar de furrulavos.

Ensin más dexámosvos esfrutar coles pegadielles y l’anovamientu que marca una dómina nueva en Telegram n’ast. ¡¡¡Esfrutái!!!

Más información tocante al anovamientu: http://noticies.softastur.org/telegram

Unes selmanes dempués de que vos amosáremos una captura del programa per twitter yá ta disponible Cutegram n’asturianu, el veceru d’escritoriu pa Telegram llibre y multi-plataforma.

¿Qué ufre esti veceru de Telegram?
Cutegram ufre una esperiencia moderna, cenciella y guapa de charrar colos tos collacios dende’l PC. Con Cutegram podrás xestionar varies cuentes dende la mesma aplicación, tener unes notificaciones intelixentes, aniciar charres secretes amás de poder ver tolos ficheros unviaos a tolos tos contautos. Sicasí, esti programa trai carauterístiques qu’entá l’aplicación oficial nun amestó.

Yá uso Webogram, ¿qué diferencies hai?
Webogram ye un serviciu web que rique l’usu d’un restolador polo que la integración col sistema nun ye bona, amás de que l’usu d’una aplicación nativa siempres va date’l meyor rindimientu ya integración posibles ente otres coses.

¿Daqué más?
Sí, pero nun vamos ser nós los que faigamos un artículu de munchos párrafos desplicando cauna de les funciones d’esti programa. Úsalu, espárdilu, ¡esfrútalu!…

Toles descargues alcuéntrense na páxina oficial del desendolcador: http://aseman.co/en/products/cutegram/

¿Tienes dubies o problemes tocante a Telegram? Ponte en contautu con nós pente’l perfil de twitter @telegram_ast, únviamos un corréu o namái comenta nesta páxina.

En xunetu de 2014 y yá na recta final, poníase en contautu con Softastur una persona de Canonical, pa comunicanos que contaben con nós. L’esfuerzu de tantos años de trabayu confirmaben que díbemos pel bon camín: un smartphone cola llingua asturiana preinstalada de fábrica.

Meses dempués, equí lu tenéis.

Ubuntu phone, salió a la lluz el pasáu fin de selmana de la mano de la empresa BQ, baxo’l modelu Aquaris E4.5. Nel so interior tien un procesador Cortex-A7 de Mediatek de cuatro núcleos a 1.3 GHz con una gráfica Mali 400, acompañaos de 1 GB de memoria RAM y 8 GB d’almacenamientu internu. La batería ye de 2150 mAh y tien doble micro-SIM. El preciu anda alredor de los 169 €

La carauterística más importante d’Ubuntu phone, ye l’usu de SCOPES, trátase d’espacios qu’amiesten conteníu procedente de dellos servicios. Diferénciense de les apps móviles pol so calter integrador. Asina, por exemplu, pa escuchar música, un usuariu pue acceder dende’l mesmu espaciu a canciones de SoundCloud o de Grooveshark. Arriendes de les funcionalidaes normales de corréu-e, navegación web, cámara, galería, etc, Ubuntu phone incorpora INRIX, que da a los usuarios d’esti smartphone accesu direutu a la información del tráficu en tiempu real. Pa crear aplicaciones pa Ubuntu Phone, los desendolcadores disponen de ferramientes basaes en HTML5 pa que puedan crear la so app de mou rápidu y cenciellu enantes de xubila a la tienda d’aplicaciones oficial.

Too esto y más… na nuesa llingua. 😉

Bienllegaos a la dómina de la mensaxería
rápida y segura.

VERSIÓN NUEVA – 2.3.3

Inclúi:

– Diseñu nuevu basáu en Material Desing
– Amestada la funcionalidá pegadielles
– Posibilidá de cambiar de númberu la to cuenta Telegram
– Gueta y unviu de GIFs dende l’aplicación
– Gueta y unviu d’imáxenes dende l’aplicación
– Agora pue emplegase https://telegram.me/nomeusuariu p’abrir conversaciones
– Posibilidá d’anubrir el to estáu
– Destrucción automática de cuenta dempués del tiempu afitáu
– Posibilidá de repitir notificaciones
– Ameyoraes les charres secretes
– Agora puen guetase los mensaxes nes charres
– Esbilla múltiple de documentos
– Milenta igües de fallos y ameyoramientos

Como vos prometimos, yá ta equí OwnCloud. Esta ye la primer versión que ta habilitada en llingua asturiana, y yá podéis esfrutala si tenéis la vuestra cuenta de OPENMAILBOX.ORG

OwnCloud ye una aplicación llibre que permite l’almacenamientu seguru de ficheros na nube (neto que Dropbox) y otres aplicaciones en llinia. Con OwnCloud dispones d’un calendariu d’eventos, un xestor de noticies, un editor de testos en llinia, visor de documentos pdf, Galería d’imáxenes.. y puedes sincronizar toos estos ficheros en tolos equipos que tengas (windows, mac, Linux,  smartphones y tabletes)

Si yá tienes la to cuenta en Openmailbox.org (sinón, tienes de facer una), namás tienes que dirixite a la páxina https://www.openmailbox.org/ y entrar escoyendo, “Login“–> “Cloud“:

y llueu inxertamos la nuestra cuenta d’usuariu @openmailbox.org y contraseña:

Una vegada dientro, yá vas ver les tos carpetes:

Nelles puedes xestionar la música, los documentos… puedes compartilos, editalos, xubir nuevos, renomalos…etc. (La función de compartir con usuariu, depende del sirvidor. Como openmailbox.org ye un sirvidor estremadamente seguru, nun tien habilitada esta función, pero sí vas poder compartir per aciu d’enllaz.)

Na esquina superior esquierda (“Ficheros“), vamos a les distintes funciones d’OwnCloud, y na esquina superior a mandrecha, podemos configurar les nuestres preferencies y cambiar la llingua por Asturianu . (Click nel nuestru usuariu,—>Personal–> (Langue/Language/Idioma)

CALENDARIU

El calendariu sirve como un organizador de xeres y eventos, y tamién pue compartise con otres persones vía enllaz. Ye importante, que marquéis la caxella “Default calendar” pa ver les actividaes nos díes correspondientes 😉

DOCUMENTOS

Owncloud permite la edición y creación de testos en formatu llibre. Tamién dispón d’un visor de pdf’s.

LLECTOR DE NOTICIES

Equí podemos xestionar les páxines de noticies que más nos presten pa tar al día.

Con OwnCloud tamién pues xestionar contautos,… escuchar música (con Ampache), Sincronizar OwnCloud con Mozilla (enllaces, favoritos, historial..etc. Namás pa usuarios de Firefox)…etc. Dexámosvos que descubráis estes coses por vosotros mesmos 😉

SINCRONIZAR CON OTROS EQUIPOS Y PRESEOS MÓVILES:

Lo mesmo que Dropblox, OwnCloud déxanos la posibilidá de xestionar y remanar los nuestros documentos dende varios equipos. Pa esto, necesitamos instalar nellos el veceru d’owncloud. Les instrucciones son mui fáciles. Namás ye dir a la páxina:

https://owncloud.org/install/#desktop

Y ellí, descargar el programa bien pa PC’s (Desktop Clients) o pa preseos móviles (Mobile Clients). Equí vamos facer la instalación pa un equipu d’escritoriu con Ubuntu (Linux). En Windows y Mac, ye tamién mui cenciello. Vamos a la páxina que dicimos…

Facemos click en “Linux Multiple distributions”, y vamos ver esta páxina:

Escoyemos Ubuntu, y llueu veremos dos moos d’instalación: vía repositorios (“Add repository and install manually”) o direutamente executando un ficheru (“Grab binary packages directly”). Yo aconséyovos la primer opción (necesitáis facer clic nos desplegables a mandrecha pa velo too (show/hide). Si veis que la primer opción paezvos complicada, entós meyor facéis la segunda solución: vais a “Grab binary packages directly“, descargáis el ficheru correspondiente a la vuestra versión, y llueu, una vegada descargáu, facéis doble clic nél pa executalu 😉

Na instalación, vais siguiendo los pasos, y cuando vos pida’l sirvidor, metéis esti:

Y yá taría fecho. Esti ye’l veceru de sincronización instaláu n’Ubuntu. Dende él, podéis xubir, descargar, desaniciar ficheros…etc, direutamente a les carpetes