Softastur

NOTA DE PRENSA

VERSIÓN EN CASTELLANO |   DESCARGAR VERSIÓN BILINGÜE EN PDF

SOFTASTUR Y LA XUNTA POLA DEFENSA DE LA LLINGUA ENTAMEN UNES XORNAES SOBRE SOFTWARE LLIBRE N’ASTURIANU

Güei vienres 20 de payares a les 19:00 y mañana sábadu 21 a partir de les 9:00
nel Llar Solidariu d’Uviéu van celebrase una charra y un taller, respeutivamente, de baldre y abiertu a tolos que quieran instalar Ubuntu, un sistema operativu llibre y gratuitu disponible n’asturianu, ente otres llingües.

El colectivu de voluntarios Softastur, dedicáu a la traducción de Software Llibre al asturianu, y la Xunta Pola Defensa de la Llingua Asturiana entamen una charra y un taller d’entrada llibre y gratuita pa deprender a instalar y utilizar el sistema opertativu llibre Ubuntu (GNU/Linux) n’asturianu.

El sistema puede convivir con otros, como puede ser Windows, nel mesmu equipu lo que facilita el procesu d’adautación.

Ubuntu inclui amás una bultable cantidá de software que permite facer too tipo de xeres, que van dende la más cenciella redaición d’un testu a la edición de videu y el retoque fotográficu, hasta trabayar como sirvidor de páxines web n’internet, por poner unos exemplos.

Xeres como grabar cd, compartir ficheros en redes p2p, reproducir películes o música tan disponibles na instalación básica del sistema. Colo que nun fai falta andar a la gueta de software adicional pa les xeres más cotidianes.

Toes estes aplicaciones básiques qu’inclui Ubuntu ya tan tornaes al asturianu, pero nun son les uniques. Yá tan disponibles la suite de preseos educativos Edubuntu, y mui pronto tarán disponibles tamién la suite ofimática OpenOffice y otres distribuciones GNU/Linux como Fedora.

Les persones interesaes en instalar el sistema nel so equipu (y que quieran mantener el sistema actual) tienen de consultar la web:
http://wiki.softastur.org/install

MATERIAL GRÁFICU

Semeyes d’otros talleres:
Xixón, 16-05-2009
http://wiki.softastur.org/Ubuntu:Install_party_en_Xix%C3%B3n
Sama (Llangréu), 16-01-2009
http://wiki.softastur.org/Ubuntu:Ubunt%C3%ADzate_en_Sama

Cartel:
http://www.flickr.com/photos/tapaponga/3989100871/

(más…)

NOTA DE PRENSA

VERSIÓN EN CASTELLANO |   DESCARGAR VERSIÓN BILINGÜE EN PDF

SOFTASTUR COMPLETA LA TRADUCCIÓN AL ASTURIANU DE LA SUITE OFIMÁTICA OPENOFFICE.ORG

La versión va tar disponible pa los usuarios de cualisquier sistema operativu a partir de la versión 3.2 de OpenOffice.org, que s’espublizará en próximes feches.

El colectivu de voluntarios Softastur ta acabante de completar la torna al asturianu de la suite ofimática OpenOffice.org. La versión nueva tará a disposición de los usuarios de cualisquier sistema operativu (GNU/Linux, Windows, Mac Os, etc) a partir de la versión 3.2 d’esti paquete de ferramientes informátiques, que s’espublizará en próximes feches.

OpenOffice.org ye anguaño el principal competidor de la suite ofimática privativa Microsoft Office, y la so penetración vien medrando de forma bultable nos años últimos, especialmente nel mercáu empresarial, profesional y alministrativu. Los últimos estudios espublizaos coinciden en que na redolada’l 15% de los usuarios de Windows nel mundu tienen instaláu esti paquete, y ye la opción mayoritaria en sistemes GNU/Linux.

La so traducción al asturianu supunxo más de dos años de trabayu pa los voluntarios de Softastur, nel que contaron col conseyu de l’Academia de la Llingua Asturiana. La torna d’Open Office ye, además, el segundu proyeutu de mayor volume completáu pol colectivu, tres de la distribución Ubuntu del sistema operativu  GNU/Linux.

Cola próxima espublización de la versión 3.2 de OpenOffice.org, los usuarios qu’asina lo deseen van poder contar con un procesador de textos (Writer), la fueya de cálculu (Calc) o el programa d’elaboración de presentaciones (Impress), ente dellos otros recursos, dafechu n’asturianu.

OpenOffice.org surdió de la suite StarOffice, desarrollada por StarDivision, que foi alquirida en 1999 por Sun Microsystems. Nel añu 2000, lliberóse’l so códigu fonte pa tentar de facer frente a Microsoft Office. Anguaño, el so códigu fonte distribúise embaxo llicencia LGPL y se puede descargar de baldre dende’l sitiu n’internet openoffice.org. La suite compónse del procesador de textos Writer, la fueya de cálculu Calc, la ferramienta de presentaciones Impress, la base de datos Base, l’editor de gráficos Draw y l’editor de fórmules matemátiques Math.

Pa más detalles, y captures de pantalla visitar l’artículu en Ta pa Ponga.

(más…)

NOTA DE PRENSA

VERSIÓN EN CASTELLANO |   DESCARGAR VERSIÓN BILINGÜE EN PDF

SOFTASTUR ENTAMA UN TALLER EN SIETES PA PROMOCIONAR EL SOFTWARE LLIBRE FRENTE AL PRIVATIVU

El sábadu 17 d’ochobre de 2009 a les 10:30 na Plaza’l Güevu de Villaviciosa

será el puntu de reunión pa tolos que quieran participar na actividá.

El colectivu de voluntarios Softastur, sofitaos por Asturlinux y l’equipu llocal d’usuarios d’Ubuntu p’Asturies, entamen un taller llúdicu tocante al Software Llibre en xeneral y GNU/Linux en particular.

Durante el taller, amás de compartir conocimientos, esperiencias y duldes, grabaráse un videu promocional de GNU/Linux pa destacar les bondaes d’esti sistema frente a otros privativos, como sátira de la campaña que vien faciendo la multinacional estaunidense Microsoft pa la versión nueva del so sistema privativu Windows.

Softastur, yá fuera de toles connotaciones étiques que conlleva l’usu del Software Llibre, quier destacar la necesidá d’usar nos equipos informáticos un sistema estable, robustu y seguru. Dalgo que col software privativu ye dificil d’asegurar, al nun facilitar el códigu y al nun ser l’usuariu propietariu del software qu’instala na so máquina.

El fechu de que GNU/Linux pueda obtenese llegalmente de baldre, que nun-y afecten los virus, ya son unos importantes argumentos a favor d’esti sistema llibre, pero Softastur quier destacar la importancia de disponer de más de 200 llingües pal interfaz del sistema, ente los que s’alcuentra l’asturianu, consideráu pola comunidá de desendolcadores como una de las 26 llingües más desarrollaes del sistema, xunto col francés, castellanu, inglés, catalán o chinu entre otres.

Softastur quier convidar tanto a usuarios de Software Llibre como a primerizos a participar d’esti día en Sietes. Los vídeos que van grabase durante l’actividá van amosase na páxina web www.sietesunpuebludespertos.com
(más…)

A les Install Parties vamos camudamo-yos el nome a Taller d’instalación.

Y entamamos otru d’Ubuntu 9.10 (saldrá a finales d’ochobre) col sofitu de la Xunta pola Defensa de la Llingua Asturiana, n’Uviéu [ver mapa] 🙂

Y si nun puedes venir, n’otros países en tol mundiu tienen munchísimos talleres pa festexar l’asoleyamientu de la versión 9.10 [Ver llista].

Xornaes d

NOTA DE PRENSA

VERSIÓN EN CASTELLANO |   DESCARGAR VERSIÓN BILINGÜE EN PDF

SOFTASTUR Y L’AYUNTAMIENTU DE MIERES ENTAMEN UNES XORNAES SOBRE SOFTWARE LLIBRE N’ASTURIANU

El xueves 24 de setiembre a les 19:00 y el vienres 25 a les 16:30 nel Atenéu de Turón (Mieres) van celebrase una charra y un taller, respeutivamente, de baldre y abiertu a tolos que quieran instalar Ubuntu, un sistema operativu llibre y gratuitu disponible n’asturianu, ente otres llingües.

El colectivu de voluntarios Softastur, dedicáu a la traducción de Software Llibre al asturianu, y la Oficina de política llingüística del Ayuntamientu de Mieres organicen una charra y un taller d’entrada llibre y gratuita pa deprender a instalar y utilizar el sistema opertativu llibre Ubuntu (GNU/Linux) n’asturianu.

El sistema puede convivir con otros, como puede ser Windows, nel mesmu equipu lo que facilita el procesu d’adautación.

Ubuntu inclui amás una bultable cantidá de software que permite facer too tipo de xeres, que van dende la más cenciella redaición d’un testu a la edición de videu y el retoque fotográficu, hasta trabayar como sirvidor de páxines web n’internet, por poner unos exemplos.

Xeres como grabar cd, compartir ficheros en redes p2p, reproducir películes o música tan disponibles na instalación básica del sistema. Colo que nun fai falta andar a la gueta de software adicional pa les xeres más cotidianes.

Toes estes aplicaciones básiques qu’inclui Ubuntu ya tan tornaes al asturianu, pero nun son les uniques. Softastur ta trabayando pa completar la traducción de la suite de preseos educativos Edubuntu, pol so interés pa la formación de los más mozos. Anguaño la mayor parte d’estes aplicaciones d’usu escolar y académicu ya tan tornaes al asturianu.

Les persones interesaes en instalar el sistema nel so equipu (y quieren mantener el sistema actual) tienen de consultar la web: http://wiki.softastur.org/install

(más…)

Yá ta disponible la web principal de Softastur.

Yera mui necesariu tener una web sencillina onde poder esplicar lo más claramente posible lo que fae Softastur, como collaborar, como conseguir el software y como conseguir aida.

Teniemos un seriu problema pa facilitar l’accesu a la mayoría de los usuarios que esperemos cola web nueva se resuelva.

Por supuestu tamos abiertos a cualesquier suxerencia pa meyorala.

Amás de la web, dende va unos díes tamos faciendo pruebes con Planeta Softastur, un planeta ye una web que recueye entraes de blogs d’una comunidá, nesti casu, Softastur. Los artículos nun tiene porque falar de Software Llibre nin son opinión nin responsabilidá de Softastur (sacante los esbillaos d’esti mesmu blogue)

NOTA DE PRENSA

VERSIÓN EN CASTELLANO |   DESCARGAR VERSIÓN BILINGÜE EN PDF

SOFTASTUR FAIRÁ UNA AMUESA DE SOFTWARE EDUCATIVU N’ASTURIANU CON PROFESORES Y ESCOLINOS

El vienres 19 de xunu de 2009 de 18:00 a 20:00 nel Telecentru de Sama (Llangréu) nes antigües escueles Dorao, daránse les primeres clases, delles materies, n’asturianu con Edubuntu para guaḥes d’ente 3 y 11 años.

Softastur, en collaboración con dellos maestros y escolinos, pondrán a preba la primer versión n’asturianu d’Edubuntu. Un conxuntu d’aplicaciones, de códigu abiertu, orientaes a la educación y la formación.

Trátase d’una iniciativa esperimental, pionera n’Asturies, entamada pol coleutivu Softastur en collaboración con docentes y padres y madres d’alumnos de dellos centros educativos de la comunidá autónoma.

La entrada será llibre y gratuita, y cualesquier guaḥe d’ente 3 y 11 años podrá participar. Al tiempu que podrá asistir cualesquier persona interesada  na actividá.

L’actividá tara dixebrada en dos clases:
-De 18:00 a 18:40, clase orientada a guaḥes d’ente 3 y 6 años coles materies de Conocencia del Mediu, Iniciación a la Informática, xuegos educativos y Cálculo básico.
-De 18:45 a 20:00, clase orientada a guaḥes d’ente 7 y 11 años coles materies de Matemátiques, Inglés, Informática y Xeografía.

Softastur ye un coleutivu de voluntarios enfotáu na traducción y llocalización de Software Llibre al asturianu. Hasta la fecha, la so principal aportación, foi la traducción del sistema operativu Ubuntu (GNU/Linux).

(más…)

VERSIÓN EN CASTELLANO |   DESCARGAR VERSIÓN BILINGÜE EN PDF

SOFTASTUR Y LA OFICINA DE POLÍTICA LLINGÜÍSTICA DE XIXÓN ENTAMEN UN TALLER GRATUITU D’INSTALACIÓN DE SOFTWARE LLIBRE N’ASTURIANU

El sábadu 15 de mayu de 2009 de 10:00 a 14:00 y de 16:00 a 21:00
nel Antiguu Institutu de Xixón va celebrase un taller de baldre y abiertu a tolos que quieran instalar Ubuntu, un sistema operativu llibre y gratuitu disponible n’asturianu, entre otros idiomas.

El colectivu de voluntarios Softastur, dedicáu a la traducción de Software Llibre al asturianu,
y la Oficina de política llingüística del Ayuntamientu de Xixón organicen un taller d’entrada llibre y
gratuita pa deprender a instalar y utilizar el sistema opertativu llibre Ubuntu n’asturianu.

El sistema puede convivir con otros, como puede ser Windows, nel mesmu equipu lo que
facilita el procesu d’adautación.

Ubuntu inclui amás una bultable cantidá de software que permite facer too tipo de xeres, que
van dende la más cenciella redaición d’un testu a la edición de video, el retoque fotográfico o
trabayar como sirvidor de páxinas web n’internet, por poner unos exemplos.

Xeres como grabar cd, compartir ficheros en redes p2p, reproducir películes o música tan
afayadices na instalación básica del sistema. Colo que no fai falta andar a la gueta de software
adicional pa les xeres más cotidianes.

Toes estes aplicaciones básiques qu’inclui Ubuntu ya tan tornaes al asturianu, pero nun son
les uniques. Softastur ta trabayando pa completar la traducción la suite de preseos educativos
Edubuntu, pol so interés pa la formación de los más mozos. Anguaño la mayor parte d’estes
aplicaciones d’usu escolar y académicu ya tan tornaes al asturianu.

(más…)

Agora que l’asturianu yá cuenta con bien d’aplicaciones en llingua asturiana, Softastur ta trabayando en intentar facer más cenciellu y fácil el usu d’estes ferramientes.

Pa ello tamos acabantes de llazar dos servicios colos qu’intentaremos aidar a la comunidá del Software Llibre y n’asturianu.

Ayer acabamos cola configuración d’un sistema de foros onde plantear toles dudes o problemes que puedan xurdir col usu, instalación, o cualesquier otru tema tocante al software llibre. Pa poder participar del foru hai de tar rexistráu, esto ye, principalmente, pa evitar mensaxes puxarra unviaos por robots.

Pa entrar al foru: http://foros.softastur.org

Y el otru serviciu nun ye más qu’esti blogue, que nun pretende ser un blogue “normal” con artículos (al estilu que nos tien acostumbraos “Ta pa Ponga” por exemplu), sinon que será la ferramienta cola que daremos anuncia de les principales actividaes y noticies del Software Llibre n’asturianu. Escoyimos el blogue, por ser mui cómodu pa escribir y mui fácil de siguir por RSS.

Pa siguir el blogue: http://blogue.softastur.org

Pa siguir el blogue por RSS: http://blogs.altuxa.com/softastur/feed

Pero los trabayos nun van finar equí, anguañu el wiki de Softastur funciona como páxina d’aniciu, algo que puede tar bien pa la xente que yá collabora col proyeutu, sicasí ta claru que a la xente que s’avera per primer vez a Softastur o que nun tien munchu conocimientu d’informática puede confundirla bastante. Por eso tamos desendolcando una páxina d’aniciu cenciella y rápida y que seya útil tanto pa la xente esperimentao como pa los que “nun saben d’ordenadores”.

Y ye que a poquinos entre tolos volutarios de Softastur tan xenerando munchu conteníu que ye dificil d’organizar, una aida p’acceder a los servicios ye la barrina de navegación que podeis ver no cimero d’esti mesmu blogue.