LibreOffice 3.5 yá ta equí

LibreOffice - The Document Foundation

The Document Foundation vien d’anunciar LibreOffice 3.5: «el meyor conxuntu d’aplicaciones llibres pa oficina, de tolos tiempos»

LibreOffice 3.5, ye la tercer versión principal del «meyor conxuntu d’aplicaciones pa oficina llibres de tolos tiempos», qu’ufre a los usuarios finales los ameyoramientos derivaos de la estratexa de desendolcu que s’adoptó de magar setiembre de 2010.  LibreOffice 3.5 vien del trabayu combináu de hackers a xornada completa (el mayor grupu de programadores espertos de códigu d’OOo) y hackers voluntarios, coordinaos pol Comité de Direición d’Inxeniería. Demientres 16 meses, una media de 80 desendolcadores cada mes proporcionaron en total más de trenta mil unvios de códigu, qu’amestaron nueves ya interesantes carauterístiques:

Writer

  • un nuevu correutor gramatical integráu pal inglés y delles llingües más
  • facilidaes tipográfiques, pa consiguir documentos d’aspeutu profesional
  • una ventana interactiva de cuenta de pallabres, que s’anueva en tiempu real
  • una nueva interfaz d’usuariu pa les testeres, pies y saltos de páxina

Impress / Draw

  • un importador ameyoráu de formes personalizaes y Smart Art dende PPT/PPTX
  •  una facilidá pa inxertar multimedia/paletes de color nos documentos ODF
  • un nuevu cambiu de pantalla pa la consola del presentador
  • nuevos finales de llinia pa diagrames ameyoraos
  • peñera d’importación de Microsoft Visio

Calc

  • sofita fasta 10,000 fueyes
  • nuevu área d’entrada de llinia múltiple
  • nueves funciones de Calc conformes coles especificaciones ODF OpenFormula
  • meyor rindimientu al importar ficheros d’otres aplicaciones d’oficina
  • esbilla múltiple na peñera automática
  • nun hai llimite pal númberu de regles del formatu condicional

Base

  •   nuevu controlador PostgreSQL nativu integráu

Amás, por primera vegada na historia de LibreOffice, se va activar la comprobación d’anovamientos en llinia, qu’informa a los usuarios cuando ta disponible una nueva versión d’esta aplicación.

«La base de códigu qu’heredamos tenía 15 años, con carauterístiques ensin integrar y fallos ensin correxir pa evitar crear problemes, y esto (col tiempu) foi l’orixe d’una gran deuda téunica», diz Caolán McNamara, desendolcador superior de RedHat que ye un de los fundadores y direutores de TDF. «Teníamos dos posibilidaes: una estratexa conservadora, que darréu prestaría a tolos usuarios, dexando’l códigu básicamente ensin camudar, o’l nuesu camín más agresivu de desendolcu de carauterístiques y anovamientu del códigu, que dio dellos problemes d’estabilidá a curtiu plazu pero que ta llevando rápidamente a un conxuntu d’aplicaciones d’oficina llibre nuevu dafechu y bultablemente ameyoráu: LibreOffice 3.5, el meyor conxuntu d’aplicaciones pa oficina llibres de tolos tiempos.»

«En dieciséis meses, tenemos algamao unos resultaos increíbles (comenta Michael Meeks, Inxenieru Distinguíu de SUSE, que tamién ye fundador y direutor de TDF), con casi trescientos desendolcadores nuevos dafechu nel proyeutu, atraíos pola llicencia copyleft, la falta d’un señalamientu de drechos d’autor ya un entornu afayadizu. Amás de les carauterístiques visibles, se traduxeron decenes de miles de comentarios del códigu del alemán, se desaniciaron miles de métodos ensin usu o anticuaos (dacuando, biblioteques completes) y se creó un conxuntu de pruebes automátiques. Magar qu’entá nos queda un llargu camín per delantre, los usuarios (que dacuando protestaron pola estabilidá del software, ya que nun sabíen de la deuda téunica cola que nos enfrentábamos) agora puen aprovechase d’una LibreOffice 3.5 abondo más llimpia, llixera y más rica en carauterístiques.»

LibreOffice 3.5 y la primera versión onde se reconoz la collaboración de comunidaes y asociaciones llocales, como ALTA en Brasil. Amás, TDF intentó agradecer a los voluntarios (cuando los pudimos identificar claramente) que más punxeron na versión 3.5, con un distintivu d’héroe en “hacking” o “bug hunting” que se presentó’l mesmu día del anunciu. TDF afala’l desendolcu d’un ecosistema global, abiertu y diversu nel que les empreses, asociaciones, comunidaes llocales y voluntarios compartan l’oxetivu común de desendolcar el meyor conxuntu d’aplicaciones pa oficina llibres de tolos tiempos.

The Document Foundation convida a que los usuarios avezaos instalen LibreOffice 3.5, y que los usuarios más conservadores sigan cola rama LibreOffice 3.4. S’encamienta a los usuarios corporativos que desplieguen LibreOffice col encontu d’un serviciu profesional, d’una empresa capaz d’ayudar cola migración, formación d’usuarios finales, serviciu téunicu y mantenimientu. The Document Foundation ufrirá ceo una llista d’organizaciones certificaes que dean esos servicios profesionales.

LibreOffice 3.5 ta disponible dende: http://www.libreoffice.org/download. Les nueves carauterístiques y los ameyoramientos se describen na infografía que se pue descargar dende: http://dl.dropbox.com/u/116590/lo35-infofinal.pdf.

Enllaz curtiu al blogue de The Document Foundation: http://wp.me/p1byPE-eF.

Tocante a The Document Foundation (TDF)

The Document Foundation ye una organización abierta, independiente, auto-gobernada y meritocrática, que se funda sobre diez años de trabayu dedicáu de la Comunidá d’OpenOffice.org. TDF se creó col convencimientu de que la cultura que naz d’una fundación independiente trai lo meyor de los collaboradores empresariales y voluntarios, y producirá el meyor conxuntu d’aplicaciones pa oficina llibres. TDF ta abierta a tou individuu que tea d’alcuerdu colos sos valores fundamentales y collabores coles sos actividaes, y da una caldia bienvenida a la participación empresarial, por exemplu, patrocinando persones que trabayen como iguales xunto con otros collaboradores de la comunidá. A 30 de setiembre de 2011, TDF tien 136 miembros y más de mil voluntarios y collaboradores pel mundu.

Contautos de prensa

Florian Effenberger (vecín de cerca de Munich, Alemania, UTC+1) Tel: +49 8341 99660880 – Móvil: +49 151 14424108 E-mail: floeff@documentfoundation.org – Skype: floeff

Olivier Hallot (vecín de Rio de Janeiro, Brasil, UTC-3) Móvil: +55 21 88228812 – E-mail: olivier.hallot@documentfoundation.org

Charles H. Schulz (vecín de París, Francia, UTC+1) Móvil: +33 6 98655424 – E-mail: charles.schulz@documentfoundation.org

Italo Vignoli (vecín de Milan, Italia, UTC+1) Tel. SIP: +39 02 320621813 – Móvil: +39 348 5653829 E-mail: italo.vignoli@documentfoundation.org – Skype: italovignoli GTalk: italo.vignoli@gmail.com

Versión n’asturianu

Asociación Softastur http://www.softastur.org – E-mail: alministradores@softastur.org

Los comentarios tan zarraos